Nahin ab jahan pe nishaan bhi..

Amjad Islam Amjad

Nahin ab jahan pe nishaan bhi,
Yahan log bhi they makaan bhi,
Meri aarzuu main jiye woh,
Mujhe kab tha aesa gumaan bhi,

Teri berukhi ke fishaar se,
Kabhi mil sake gi amaan bhi,
Kisi khaakdaan ke hisaar main,
Meri khawhishon ka jahan bhi,

Ajab uss ka rang-e-jamaal hai,
Ke chamak utha hai makaan bhi,
Ajab us haseen ka khayal hai,
Ke mehak utha hai gumaan bhi,

Isi aasmaan ki chhat talay,
Mera aashiyan bhi urraan bhi,
Tere ik ishaare ke muntazir,
Yeh zameen bhi zamaan bhi,

Tere chashm-e-khush ki panaah main,
Mere khawb bhi mere maan bhi,
Main jahan geya mere sath thi,
Meri umar bhar ki thakaan bhi..

sab kuch kaha magar na

Altaf Hussain Hali

age bare na qissa-e-ishq-e-butan se ham
sab kuch kaha magar na khule razdan se ham

ab bhagte hain saya-e-ishq-e-butan se ham
kuch dil se hain dare hue kuch asman se ham

hanste hain us k giriya-e-beikhtiyar par
bhule hain bat kah k koi razadan se ham

ab shauq se bigar k baten kiya karo
kuch pa gaye hain ap ki tarz-e-bayan se ham

jannat mein tu nahin agar ye zakhm-e-teg-e-ishq
badlenge tujhko zindagi-e-jawidan se ham

Jinhen main dhoondta tha asmanon mein zameenon main..

Allama Iqbal

Jinhen main dhoondta tha asmanon mein zameenon main,
Woh nikle mere zulmat khana-e-dil ke makeenon main,

Kabhi apna bhi nazaara kiya hai tu ne ae majnoon,
Ke laila ki tarah tu bhi hai mehmil-nasheenon main,

Mahine vasl ke gharriyon ki surat urrte jaate hain,
Magar gharriyan judaayi ki guzarti hain maheenon main,

Mujhe roke ga tu ae na-khuda kya gharaq hone se,
Ke jin ko doobna ho, doob jate hain safeenon main,

Jalaa sakti hai shama-e-kushta ko mauj-e-naffas in ki,
Elahi! Kya chupaa hota hai ehl-e-dil ke seenon main,

Na puch in kharqa poshon ki, iradat ho to dekh in ko,
Yadd-e-baiza liye baithe hain apni aasteenon main,

Kisi aese sharar se phoonk apne kharman-e-dil ko,
Ke khurshid-e-qayamat bhi ho tere khoshaa-cheenon main,

Mohabbat ke liye dil dhoond koi tootne wala,
Ye woh mai hai jise rakhte hain nazuk aabgeenon main,

Saraapa husn ban jata hai jis ke husn ka ashiq,
Bhala ae dil haseen aesa bhi hai koi haseenon main,

Numayan ho ke dikhla de kabhi in ko jamaal apna,
Bohat muddat se charche hain tere baareek beenon main,

Khamosh ae dil! Bhari mehfil mein chillaana nahin acha,
Adab pehla qareena hai mohabbat ke qareenon main,

Bura samajhun inhe, mujh se to aesa ho nahin sakta,
Ke main khud bhi to hun iqbal apne nukta-cheenon main..

Zindagi sirf issi dhun main guzarey jayen..

Adeem Hashmi

Zindagi sirf issi dhun main guzarey jayen,
Bass tera naam, tera naam pukarey jayen,

Jab yeh tay hai ke yahan koi nahin aye ga,
Kis ki khatir dar-o-deewar sanwarey jayen,

Aik tujh tak na pohanch paye mere dard ki aanch,
Aasman tak to mere gham ke sharaarey jayen,

Jab mulaqat na thi tab to koi baat na thi,
Ab yeh tanhai ke din kese guzarey jayen,

Yahan ghamkhawaar nahin hai wahan azaar nahin,
Kiss jahan mein yeh tere dard ke maarey jayen,

Main andheron mein nahin main to wahan jaon ga,
Woh jahan sath mere chaand sitarey jayen,

Jeet kar to kahin le jaye musalsal hum ko,
Aur hum roz teri chaah mein haarey jayen,

Marg*-e-jaan na sahi, marg-e-mohabbat hi sahi,
Zindagi kuch to tera qarzz utarey jayen,

Fasilon se na hua josh-e-mohabbat ka ilaaj,
Yeh to kuch aur bhi jazbon ko ubhaarey jayen,

Bazm-e-ehbaab to tasveer ka ik rukh hai Adeem,
Is mein dushman bhi to do chaar hamarey jayen,

Wassl ke baad mohabbat ki sazaa theek Adeem,
Maarey jayen bhi to kyon muft main maarey jayen..

(marg;casualty)

Gulon si guftguu karen qayaamton ke darmiyaan..

Ada Jafri

Gulon si guftguu karen qayaamton ke darmiyaan,
Hum aese log ab milen hikaayaton ke darmiyaan,

Lahuu-lahaan ungliyaan hain aur chup kharri hun main,
Gul o samaan ki bepanaah chaahton ke darmiyaan,

Hatheliyon ki ott hi chiraagh le chalun abhi,
Abhi sehar ka zikr hai riwaayaton ke darmiyaan,

Jo dil mei thi nigaah si nigaah mei kiran si thi,
Woh daastaan ulajh gayi wazaahton ke darmiyaan,

Sahiifa-e-hayaat mei jahan jahan likhi gayii,
Likhi gayii hadees-e-jaan jaraahton ke darmiyaan,

Koi nagar koi galii shajjar ki chaaon hi sahi,
Yeh zindagi na katt sake musaafaton ke darmiyaan,

Ab uss ke haal-o-hadh ka rang mujh se puuchna abass,
Nigaah jhappak jhappak gayi iraadaton ke darmiyaan,

Sabaa ka hath thaam kar “adaa” na chal sako gi tum,
Tamaam umr khawb khaawb saa.aaton ke darmiyaan

Sun To sahi jahaan main

Aatish Haider Ali

sun to sahii jahaan main hai teraa fasaanaa kyaa
kahti hai tujh se Khalq-e-Khudaa Gaibanaa kya

zina saba kaa Dhundati hai apni musht-e-Khaak
baam-e-baland yaar ka hai astana kya

ati hai kis tarah se meri kabz-e-ruuh ko
dekhun to maut dhund rahe hai bahana kya

betab hai kamal hamara dil-e-aziim
mahmaan saray-e-jism ka hoga ravana kya

Ajeeb taur ki hai ab ke sargiraani meri..

Abbas Tabish

Ajeeb taur ki hai ab ke sargiraani meri,
Main tujh ko yaad bhi kar loon to meherbani meri,

Main apne aap me gehraa utar geya shayed,
Mere safar se alag ho gayi rawaani meri,

Bass ek morr mere zindagi me aaya tha,
Phir iss ke baad ulajhti gayi kahaani meri,

Tabaah ho ke bhi rehta hai dil ko dharrka sa,
Ke raayegaan na challi jaaye raigaani teri,

Main apne baad bohat yaad aaya karta hoon,
Tum apne paas na rakhna koi nishaani meri..

Yeh mohabbat bhi hai kya rog faraz..

Ahmad Faraz

Yeh mohabbat bhi hai kya rog faraz,
Jis ko bhoolen woh sadaa yaad aye..

Haaye Wo Lamha Ke Jab Tujh Se Shanasaayi Howi

Wasi Shah

Haaye Wo Lamha Ke Jab Tujh Se Shanasaayi Howi
Phir Jo Honi Thi Meri Jaan Wo Ruswaayi Howi

Apni Nakaam Mohabbat Ka Na Yun Charcha Karo
Zakham Barh Jaye Ga Gar Is Ki Paziraayi Howi

Phir Zamanay Mein Kisi Ne Ose Dekha Na Suna
Tere Darbaar Mein Jis Shakhs Ki Shanwaayi Howi

Jab Teri Yaad Ko Koi Bhi Thikaana Na Milay
Meri Baahon Mein Chali Aati Hai Ghabraayi Howi

Kitni masoom ho, naazuk ho, hamaqat na karo..

Wasi Shah

Ab magar kuch bhi nain, kuch bhi nahin ho sakta,
Apne jazbon se yeh rangeen shararat na karo,

Kitni masoom ho, naazuk ho, hamaqat na karo,
Baar’haa tum se kaha tha ke mohabbat na karo..

Sari raat ki jaagi aankhein..

Wasi Shah

Sari raat ki jaagi aankhein,
College mein kiya parrhti hon gi,
Yunhi khoye, dil hi dil mein,
Jaanay kiya kiya karti hon gi,

Sari raat ki jaagi aankhen,
Koi bolay, kaan na dharna,
Koi hillay to ek dam darna,
Koi daikhe in ka barhna,
Apne aap say larti hon gi,

Sari raat ki jagi aankhein,
Apni kitaabein phartey rehna,
Us ki baaten kartey rehna,
Us ki yaadein ghartey rehna,
Jeetay jeetay marti hon gi,

Sari raat ki jagi aankhein,
College mein kiya parrhti hon gi..

Maan lai ab bhi meri jaan-e-adaa, dard na chun..

Wasi Shah

Maan lai ab bhi meri jaan-e-adaa, dard na chun,
Kaam aati nahin phir koi duaa, dard na chun,

Aur kuch dair mein mujh ko chale jana hoga,
aur kuch dair mujhe khawab dikha, dard na chun,

Aik bhi dard na kam hoga keyi sadiyon mein,
Ab bhi kehta hoon tujhe waqt bachaa, dard na chun,

Woh jo likha hai kisi taur nahin ttal sakta,
Aa mere dil main koi deep jala, dard na chun,

Main tere lamss se mehroom na rah jaaon kahin,
Aakhri baar mujhe khud se laga, dard na chun,

Ab to yeh raishmi purain bhi chaddi jati hain,
Khud ko ab bakhssh bhi de, zulm na dhaa, dard na chun,

Yeh nahin hon ge to khali nahin ho jaon ga mein,
Mere zakhmon se koi geet bana, dard na chun,

Kuch na de ga yeh masaayel se ulajhtey rehna,
Chorr sab kuch meri banhon mein samaa, dard na chun..

Ajeeb saanehaa guzraa hai mujh pe aaj ki sham..

Wasi Shah

Ajeeb saanehaa guzraa hai mujh pe aaj ki sham,
Main aaj shaam tumhare hijar main udaas na tha,

Ab aik saal to yeh aik gham hi kaafi hai,
Tumhari salgiraah par bhi tumhare paas na tha..

Apna to chahton mein yehi ik asool hai..

Wasi Shah

Apna to chahton mein yehi ik asool hai,
Tera bhalaa bura humain sab kuch qubool hai,

Yeh umar bhar ka jaagna bekaar hi na jaye,
Tu naa mila to saari reyaazat fazool hai,

Khud hi kaha tha tu ne meri jaan chorr de,
Ab chorr di to kyon tera chehra malool hai,

Aye Maan yeh meri shohrtain meri yeh iztain,
Kuch bhi nahin bass tere kadmon ki dhool hai,

Aayi jo teri yaad to aankhain barass parri,
Iss waqt tere dard ka dil per nazool hai,

Ik doosrey ke waastey dono baney Wasi,
Guldaan mera dil hai teri yaad phool hai..

Meri maano, To laut aao…

Wasi Shah

Abhi kuch bhi nahin badla,
Darakhton par wohi mausam abi tak muskuratey hain,
Abhi tak surmeyi shamain hamarey sath roti hain,
Abhi tak mere honton per tumhare honton ki khushbu
Raqss karti hai,

Abhi tak meri ankhon mein tumhare khawb hanstey hain,
Abhi tak mere hathon per tumhari ungliyon
ki narm pooron se likhey sab harf
zinda hain,

Abhi tak mere seeney mein tumhari saans chalti hai,
Abhi to raston par doodhiya pairon se parney waley
sarey naqsh qayem hain,

Abhi almaariyon mein sarey tohfey gungunatey hain,
Tumhare khat abhi bhi raat ki tanhai mein mujh se,
Tumhari baat kartey hain,

Bohat se saal guzrey hain,
Bohat se waqt beeta hai,
Meri chahat nahin beeti,
Meri himmat nahin guzri,
Abhi kuch bhi nahin badla,
Abhi kuch bhi nahin badla,

Agar chaho,
Agar samjho,
Meri maano,
To laut aao…

Mera qadmon pe mera sar hai keyi sadiyon se..

Wasi Shah

Kesa khaufnaak sa manzar hai keyi sadiyon se,
Mera qadmon pe mera sar hai keyi sadiyon se,

Khauf rehta hai na sailaab kahin le jaye,
Meri palkon pe mera tera ghar hai keyi sadiyon se,

Ashk aankhon mein sulagtey huye so jatey hain,
Yeh meri aankh jo banjar hai keyi sadiyon se,

Kaun kehta hai mulaqat meri aaj ki hai,
Tu meri rooh ke andar hai keyi sadiyon se,

Mene jis ke liye har kisi ko naraaz kiya,
Rooth jaye na yehi dar hai keyi sadiyon se,

Uss ko aadat hai jarr’en* kaat’tey rehne ki Wasi,
Jo meri zaat ka mehwar* hai keyi sadiyon se..

(jarr’en;root, mehwar;focus)

Ye Kab Kaha Tha Nazaaron Se Khauf Aata Hai

Wasi Shah

Ye Kab Kaha Tha Nazaaron Se Khauf Aata Hai ?
Mujhe Tou Chaand Sitaaron Se Khauf Aata Hai,

Main Dushmanon K Kisi Waar Se Nahi Darta,
Mujhe To Apne Hi Yaaron Se Khauf Aata Hai,

Khiza Ka Jabar Tou Seene Pay Rok Lete Hain,
Hamein Udaas Bahaaron Se Khauf Aata Hai,

Mile Hain Dosto Besaakhiyon Se Gham Itne,
Mere Badan Ko Sahaaron Se Khauf Aata Hai….

Main Iltifaat Ki Khandaq Se Door Rehta Hun,
Ta’alluqaat K Gaaron Se Khauf Aata Hai..

Is Zameen Pe Bhi Hay Selaab Meray Ashkon Say

Wasi Shah

Sochta Hoon Ke Usay Neend Bhi Aati Hogi
Ya Meri Tarah Faqat Ashk Bahati Hogi

Wo Meri Shakal Mera Naam Bhulanay Wali
Apni Tasweer Se Kia Aankh Milati Hogi ?

Is Zameen Pe Bhi Hay Selaab Meray Ashkon Say
Meray Matam Ki Sada Arsh Helati Hogi

Shaam Hotay Hi Wo Chokhat Pay Jala Kar Shamain
Apni Palkon Pay Kaii Khowab Sulati Hogi

Us Nay Silwa Bhi Liye Hongay Siya Rang Lebaas
Ab Moharram Ki Tarah Eid Manati Hogi

Hoti Hogi Meray Bosay Ki Talab Main Pagal
Jab Bhi Zulfon Main Koii Phool Sajati Hogi

Meray Tareek Zamano Say Nikalnay Wali
Roshni Tujh Ko Meri Yaad Dilati Hogi

Dil Ki Masoom Ragain Khud Hi Sulagti Hogi
Joon Hi Tasweer Ka Kona Wo Jalati Hogi

Roop Day Kar Mujhay Us Main Kisi Shehzaday Ka
Apnay Bachon Ko Kahani Wo Sunati Hogi

Tum mere dard bhi, gham bhi, alaam bhi tum..

Wasi Shah

Tum mere dard bhi, gham bhi, alaam bhi tum,
Tumn mera chain ho jana, mera araam bhi tum,

Kamyaabi ko nahin hum ne tumhe chahaa hai ,
Hum tumhare hain bhaley ho gaye nakaam bhi tum,

Main maseeha hoon agar, mera wazeefa tum ho,
Main hoon mujrim meri jaan mera ilzaam bhi tum,

Kya zaroorat hai mujhe dard ke me’khaanon ki,
Tumhi nasha, tumhi paimaana, mera jaam bhi tum,

Mukhtlif se bahaanon se mujhe sochtey ho,
Aik din khul ke pukaro ge mera naam bhi tum,

Yeh seyaasat bhi ajab khail hai bholey panchi,
Yahan seyaad bhi tum ho, to teh’daam bhi tum,

Jis se roshan mera aangan hai tumhi ho woh chiraag,
Sach to yeh hai ke tumhi ghar ho, dar-o-baam bhi tum,

Raat din tum ko faqat tum ko mujhe sochna hai,
Meri furssat bhi tumhi aur mera har kaam bhi tum..

Dheeray Se Sarakti Hai Raat Us Ke Aanchal Ki Tarah

Wasi Shah

Dheeray Se Sarakti Hai Raat Us Ke Aanchal Ki Tarah
Uska Chehra Nazar Aata Hai Jheel Main Kanwal Ki Tarah

Baad Muddat Usko Daikha To Jism-o-Jaan Ko Yun Laga
Pyasi Zameen Pe Jaisay Koi Baras Gaya Baadal Ki Tarah

Roz Kehta Hai Seenay Pe Sar Rakh K Raat Bhar Jaga’uon Ga,
Sar-e-Sham Hee Mujhe Aaj Phir Sula Gaya Wo Kal Ki Tarah,

Mere Hee Dil Ka Makee.n Nikla Wo Shakhs “Wasi”
Aur Mein Shehar Bhar Me Dhundta Raha Usy Kisi Pagal Ki Tarah

Befaiz logon se nibhaa kar kuch nahin milta..

Wasi Shah

Kisi ki aankh se sapne churaa kar kuch nahin milta,
Munddairon se chiraghon ko bhuja kar kuch nahin milta,

Sakoon un ko nahin milta kabhi pardes ja kar bhi,
Jinhe apne watan se dil laga kar kuch nahin milta,

Usey kehna ke palkon pe na taanke khawb ki jhaalar,
Samandar ke kinaare ghar bana kar kuch nahin milta,

Na jaane kon se jazbe ki yoon taskeen karta hoon,
Bazaahar to tumhare khat jalaa kar kuch nahin milta,

Usey main pyaar karta hoon to mujh ko chain ata hai,
Woh kehta hai usey mujh ko sataa kar kuch nahin milta,

Mujhe aksar sitaaron se yehi awaaz ati hai,
Kisi ke hijar main neendain ganwaa kar kuch nahin milta,

Jigar ho jaaye ga chhalni, yeh aankhain khoon royen gi,
Wasi, befaiz logon se nibhaa kar kuch nahin milta..

Befaiz logon se nibhaa kar kuch nahin milta..

Wasi Shah

Kisi ki aankh se sapne churaa kar kuch nahin milta,
Munddairon se chiraghon ko bhuja kar kuch nahin milta,

Sakoon un ko nahin milta kabhi pardes ja kar bhi,
Jinhe apne watan se dil laga kar kuch nahin milta,

Usey kehna ke palkon pe na taanke khawb ki jhaalar,
Samandar ke kinaare ghar bana kar kuch nahin milta,

Na jaane kon se jazbe ki yoon taskeen karta hoon,
Bazaahar to tumhare khat jalaa kar kuch nahin milta,

Usey main pyaar karta hoon to mujh ko chain ata hai,
Woh kehta hai usey mujh ko sataa kar kuch nahin milta,

Mujhe aksar sitaaron se yehi awaaz ati hai,
Kisi ke hijar main neendain ganwaa kar kuch nahin milta,

Jigar ho jaaye ga chhalni, yeh aankhain khoon royen gi,
Wasi, befaiz logon se nibhaa kar kuch nahin milta..

Aik din aye ga woh shakss hamara hoga..

Wasi Shah

Uss ki ankhon main mohabbat ka sitara hoga,
Aik din aye ga woh shakss hamara hoga,

Tum jahan mere liye seepiyan chunti hogi,
Woh kisi aur hi duniya ka kinaara hoga,

Zindagi! ab mera naam na shamil karna,
Gar yeh tehh hai yehi khail dobaraa hoga,

Jis ke hone se meri saans chala karti hai,
Kis tarah us ke bina mera guzaara hoga,

Yeh achaanak jo ujaala sa hua jata hai,
Dil ne chupke se tera naam pukara hoga,

Ishq karna hai to din raat usey sochna hai,
Aur kuch zehen main aaya to hasaara hoga,

Yeh jo paani main chala aaya sunehri sa gharoor,
Uss ne daryaa main kahin paaon utaara hoga,

Kon rota hai yahan hijar ke sanaatton main,
Mere jesa hi koi hijar ka maara hoga,

Mujh ko maloom hai joon hi main qadam rakhoon ga,
Zindagi tera koi aur kinaara hoga,

Jo meri rooh main badal se garajte hain Wasi,
Uss ne seeney main koi dard utaara hoga,

Kaam mushkil hai magar jeet hi loon ga us ko,
Mere maula ka Wasi jab ishaara hoga..

Tere gale main jo baahon ko daal rakhte hain..

Wasi Shah

Tere gale main jo bahon ko daal rakhte hain,
Tujhe manane ka kesa kamaal rakhte hain,

Tujhe khabar hai tujhe sochne ki khatir hum,
Bohat se kaam muqadar par taal rakhte hain,

Koi bhi faisla hum soch kar nahin karte,
Tumhare naam ka sikka uchhaal rakhte hain,

Tumhare baad ye aadat si ho gayi apni,
Bikharte sookhtey patey sambhaal rakhte hain,

Khushi si milti hai khud ko aziyaten de kar,
So jaan boojh kar dil ko nidhaal rakhte hain,

Kabhi kabhi woh hans kar dekh lete hain,
Kabhi kabhi mera be-hadh khayal rakhte hain,

Tumhare hijar mein ye haal ho gaya apna,
Kisi ka khat ho ussey bhi sambhaal rakhte hain,

Khushi mile to tere baad khushi nahin hoti,
Hum apni aankh mein har dam malaal rakhte hain,

Zamane bhar se bacha kar wo apne aanchal mein,
Mere wajood ke tukrre sambhal rakhte hain,

Kuch is liye to behaal ho gaye hum log,
Tumhari yaad ka be-hadh khayaal rakhte hain..

Kal hamesha ki tarah uss ne kaha yeh phone pr..

Wasi Shah

Kal hamesha ki tarah
uss ne kaha yeh phone pr
main bohat masroof hoon
mujh ko bohat se kaam hain

Is liye tum aao milne
main to aa nahin sakta
ab har riwaayet torr kar
iss baar maine keh diya

Tum jo ho masroof to
main bhi bohat masroof hoon
tum jo ho mashoor to
main bhi bohat maroof hoon

Tum agar ghamgeen ho
main bhi bohat ranjuur hoon
tum thakkan se chuur ho
main bhi thakkan se chuur hoon

Jaane mann
hai waqt mera bhi bohat hi qeemti
kuch purane doston ne milne ana hai mujhe
main bhi ab faragh nahin
mujh ko bhi laakhon kaam hain

Warna kehne ko to sab lamhe tumhare naam hain
meri ankhen bhi bohat bojhal hain
sona hai mujhe
rat.jagon ke baad neendon main khona hai mujhe

Main lahuu apni anaaon ka
bahaa sakta nahin
tum nahin aati
to milne main bhi aa sakta nahin

Us ko yeh keh kar Wasi
maine receiver rakh diya
aur phir apni anaaa ke paaon pe
sar rakh diya..

To main bhi khush hoon..

Wasi Shah

To main bhi khush hon koi us se ja ke keh dena,
Agar woh khush hai mujhe be-qaraar karte huye,

Tumhe khabar hi nahin hai ke koi toot geya,
Mohababton ko bohat paayedaar karte huye..